Ավտո վարկեր

Ավտովարկերը տրամադրվում են միայն ու միայն ավտոմեքենաներ գնելու համար։ Լվացքի մեքենաներն այս կատեգորիայի մեջ չեն մտնում։

Սրանք նպատակային վարկեր են։ Եվ համարվում է, որ այս վարկը վերցնողը բարելավում է կենցաղը, ավելի լավ է ապրում և այլն։ Դա, իհարկե, վիճելի պնդում է երթևեկության ու խցանումների այս վիճակում։

Բանկերն այս վարկերը տալիս են սպառողականից ավելի ցածր տոկոսով։ Բայց գյուղվարկերի համեմատ, սրանք ավելի թանկ են։ Բացառություն են էլեկտրական մեքենաները․ դրանք էլ դե միշտ արտոնությունով են, չէ՞։

Ու քանի վերջին տարիներին էլի մեքենա շատ են բերում, ավտովարկերը շատացել են։ Ավելին, հիմա մեծ թվով ավտովարկեր տալիս են նաև վարկային կազմակերպությունները։ Բայց բանկերը դեռ առաջատար են այս հարցում։

Բայց բանկեր / վարկային կազմակերպություններ հարցում կողմնորոշվելու համար առաջնահերթ նայեք տոկոսները։ Դրանք սարերի ու ձորերի տարբերություն ունեն։

Ավտովարկերի դեպքում բանկերն ու վարկային կազմակերպությունները ավելի շատ են ուշադրություն դարձնում վարկունակության գնահատականին։ Ավելին, դա ավելի կարևոր է դառնում, եթե վարկով գնում եք օգտագործած մեքենա (բանկային լեզվով՝ երկրորդական շուկայից)։

Պատճառն էլ իրականում տրամաբանական է։ Ավտովարկի դեպքում որպես վարկի գրավ դրվում է հենց գնվող մեքենան։ Ու քանի որ այլ գրավ չկա, բանկերն ու ՎԿ-ները ավելի ուշադիր են զննում իրենցից վարկ վերցնողին, որպեսզի վստահ լինեն, որ հետ են ստանանլու գումարը, ոչ թե որպես գրավ թողնված հին մեքենան։

Նաև հենց այդ պատճառով է, որ օգտագործած մեքենաների գնման դեպքում էլ ավելի ուշադիր են։ Ի տարբերություն ավտովարկերի, օրինակ, գյուղվարկերի դեպքում ուշադրությունն այդքան մեծ չէ, քանի որ գյուղվարկերի դեպքում մարդիկ նաև կարող են անշարժ գույք դնել գրավի տակ։ Իսկ ավտովարկերի դեպքում այդպես չէ։

Համարյա նույն պատճառով առաջնային շուկայից (սալոնից) գնված մեքենայի համար վարկի տոկոսներն ու կանխավճարը կարող են ավելի ցածր լինել։ Որովհետև բանկը վստահ է՝ եթե փողը չստանա, մեքենա կստանա։ Իսկ երկրորդային շուկայի դեպքում գրավ դրված հին մեքենան կարող է բանկին ձեռնտու չլինի։

Ավտոմեքենաների ԱՊՊԱ-ն քիչ է, վարկի դեպքում պետք է ունենալ նաև ԿԱՍԿՈ։ Այսինքն վարկով վերցրած մեքենաները նույնպես պետք է ապահովագրված լինեն հենց վարորդի մեղքով վթարներից։

Սա բանկերը սովորաբար ներառում են պայմանագրի մեջ, որպեսզի մեքենաները, որ նաև որպես գրավ են ծառայում, չկորցնեն իրենց արժեքը։ Ավելին, նրանք նաև մարկետինգային քայլ են անում՝ նշելով, թե իրենք կտրամադրեն ԿԱՍԿՈ ապահովագրությունը։

Բայց ձրի պանիրը ․․․ մտնում է բանկի փաստացի տոկոսադրույքի մեջ։ Այսինքն, եթե բանկը իր վրա է վերցնում ապահովագրության ծախսը, ապա այն որևէ կերպ ներառում է տոկոսի մեջ, որը վճարելու եք նորից Դուք։

Օրինակ, բանկերից մեկն առաջարկում է, որ այն դեպքում, երբ ԿԱՍԿՈ ապահովագրությունը իրականացվում է բանկի կողմից, վարկի տարեկան անվանական տոկոսադրույքը սահմանվում է 2 տոկոսային կետով ավելի բարձր:

Ամեն դեպքում՝ բանկից բանկ մոտեցումը տարբեր է։ Կան դեպքեր, երբ վարկը փոքր է, իսկ կանխավճար շատ եք մուծել, ու բանկը այլևս կարիք չի տեսնում ԿԱՍԿՈ պահանջել։

Նախ ամեն բանկ իր նախընտրելի ապահովագրական կազմակերպություններն ունի և միայն նրանց հետ է աշխատում ավտովարկ տալիս։ Երկրորդը, կարևոր է, թե որքան կգնահատվի այն մեքենան, որ ուզում եք գնել վարկով։ Ինչքան բարձր գնով գնահատվեց, այնքան հեշտ կլինի վարկը վերցնել։

Բացի ապահովագրության ու գնահատման ծառայություններից, հնարավոր է, որ բանկը անձի կյանքի ապահովագրություն պահանջի։

Սրանից էլ բացի, կան գրավի պետական գրանցման, գործարքի նոտարական հաստատման և այլ «մանր-մունր» ծախսեր, որոնք իրար գլուխ հավաքելուց հետո ահագին էլ մեծ գումար են դառնում։

Վարկ տալ-չտալու համար բանկը կարող է դիտարկել հետևյալը․

✅ Վարկային պատմությունը նորմալ է, թե չէ,
💰 Եկամուտ ունեք, թե չէ,
📅 Եղած վարկերի ամսական մարումները անում եք, թե չէ,
👴 Տարիքը բավարա՞ր է մեքենա ունենալու կամ դրա համար վճարելու համար,
🚗 Այլ գործոններ

Եթե ամեն ինչ նորմալ է, և վարկը հաստատվել է, ապա այն Ձեզ փոխանցվելու է պարտադիր անկանխիկ։ Դա նաև տեղավորվում է Հայաստանում անկանխիկ գործարքները շատացնելու քաղաքականության մեջ։

Ավելին, պայմանագիրը կարող է լինել եռակողմ, այսինքն բացի Ձեզանից ու բանկից (ՎԿ-ից) պայմանագրի կողմ կարող է լինել նաև մեքենայի տերը (դիլերը, դալալը, սեփականատերը և այլն)։

Էլեկտրական շարժիչով մեքենաների նկատմամբ վարկ տվողները ունեն առանձնահատուկ դրական վերաբերմունք։ Պատճառը գուցե նաև կանաչ տնտեսության անցման մղումն է։ Բայց ավելի կարևոր է փողային շահագրգռվածությունը։

Ամեն դեպքում, եթե բանկն ունի առանձին էլեկտրական մեքենաների համար նախատեսված վարկ, ապա դրա տոկոսադրույքը մի փոքր ավելի ցածր է, քան մյուս մեքենաների համար տրվող վարկերինը։

Էլեկտրական մեքենաների համար վարկերի տրամադրմանը, օրինակ, օժանդակոմ են նաև տարբեր հիմնադրամներ, որոնց նպատակը կանաչ տնտեսությունն ու շրջակա միջավայրի պահպանությունն են։

«Հայաստանի վերականգնվող էներգետիկայի և էներգախնայողության հիմնադրամն», օրինակ, իր ծրագրի շրջանակներում անհատական օգտագործման էլեկտրական ավտոմեքենաների ձեռք բերելու վարկերին է աջակցում։